Kulpui Run

“Kulpui run”

                     A raltak June 24 zan han rengram simbial a Belonia khopui a chun CPI(M) nih BJP tantu hei laia nansa vaikan ha nih ha inrawta in sualna an tan a chang. Ma angkata party tantu hei laia buaina an piang leia chun tualsung a nu-nai hei chu nansa vaikan an ti in an rithla an vai ta zawk. June 24 zana buaina lei chun CPI(M) tantu hei laia mi 3 ka chu nansa takin invuak an tawng leiin hliamin an awm ta nghal zawk. Chun, an party tan tu hei BJP tantu hei hmangin in hliamin an awm lei chun buaina chu ngailam pan hnengin siatna tiang chun a pan ta nghala. June 25 han, CPI(M) tantu hei chun BJP tantu hei chu Bus in an hong kal lai chu loi khapin nansa vaikan kut anin tuarin anin hliam tir ve nghal a chang. Ma angkata ha nih ha inrawta in sualna chu a pung ding zia chu thlir lawkin Belonia khopui nih a kawl vel kapai hmun huapin carfew (sec 144 Cr.PC) chun hmun a la ta zawk. Ma hnung chun buiana chu a pung loina dingin CRPF/TSR/POLICE tamtawk fe inthum in an ta zawk. Chun, CPI(M) nih BJP party tantu hei laia chun inhliamna em chu an piang tak no homin, tualsung boiruak chu tina in a sip ta nghal.

                            Ma angkata ha nih ha inrawta inrun na/insualna hi a hma hom han rengrama hmun hrang hranga aloi in piang nai thin. Changrochu, belonia khopuia ma angkata party tantu hei laia buaina inpiang thut hin thil dang dai zawk anen ngaitua tira, machu a hong tarlang tum keti a hnuaia angka hin.

          Rengrama chun sim bial hi CPI (M) hei kulpui a chang. Mahi hun sawt ka hma homa an kulpui loi chang nai thin nih rengrama sawrkar an siamna a hmun poimaw tak lua nai thin a chang. Ma angkata political kulpui hi in ka mo changing run thei a chang chun machu hmatianga 2018 assembly inthlangpuia chun BJP hei ding chun hmalakna thatak changa ti ti chu ringhnel ding aboi. BJP govt hi central a chun ane awptu a loi chang leia nih India ram pum puia danginlam taka CPI(M) in an sawrkar na achang leiin party ‘think tank’ hei mit lut tak hom chu aching. An thil tum chu, rengrama hin party tantu hei hmangin buaina inpiang tira, hnam nih hnam/sakhaw nih sakhaw in ral tira atuna CPI(M) party chu inthlahniam tirin, hnung tianga kawt hmangin thuneina la chu an thil tum lian a chang. Ma policy hmang hin state thenka ti a chun sawrkar hom an siam ti ei hmu nih ei hoi.

Chun, ei hoi dinga poimaw chu, CPI(M) mo ei tan BJP mo ei tan awle TMC/IPFT mo ei tan, ma chu mani mimal zalenna nih ding lam a chang zawk. Changrochu, party ki tan luat leia mi mita hmelma dinghmun ki va hlaw chun machu chu mimal nih insung ding hom ti awm a chang. Thuneina hi mi kapai in ei um pak. Hmatianga 2018 assembly election dinga in ningna/inpuachana chu a tun hin party tin sung rila chun hmun a la vu. Thuneina a an thung thei na ding loi chang chun thisen insuak tir, tualthat, hnam nih hnam/sakhaw nih sakhaw indoi tir hi mihriamin ei ngam. Maleiachun, party thenka ei tan luat leiin hmang-sualin awm no ning hom chu tu homin ei ti thei naw.

A tawp taka chun, ma kawnga hin fiminkhur feka ei inka nih hma ei lak chu keima mimal angkan nangni ke ngen hoi.

(N.B-An ziaktu hi rengrama Police department a sin a chang. A chunga in ziaka om thil khi keima mimal ngiatuana dungzuia hong I tarlang a chang, mimal/hnam/koihran ki loi ching na leiin lung awiloina thlung an awm chun an ni hoi thiam ke awi.)